Garoowe, Somalia, July 21, 2018 (Saxafi) – Ururka Al-Shabaab ee buuraleyd Galgala ayaa shalay la wareegey tuulada Af-Urur oo 100 KM Koonfur Galbeed kaga beegan magalaada Boosaaso xarunta ganacsiga maamul-goboleedka Puntland ee Somalia.
Warbaahinta ururka Al-Shabaab ayaa baahisay in ciidamo ay leeyihiin la wareegeen deegaankaas.Ciidamada Puntland oo saldhigga ku lahaa Af-urur ayaa isaga baxeen doraad.
Tuulada Af- urur oo ku taal goob istaraatiiji ah ee laga ilaaliyo dhaqdhaqaaqa kooxdanbuuraha Galgala ayaa waxaa loo sababeynayaa ka bixistooda degaankaas mushahar la’aan la soo gudboonaatey iyagoo u ruqaansadey dhanka tuulada Kalabaydh.
Ururka Al-Shabaab oo dagaal dhumaaleysi ah kula jira ciidamada Puntland ayaa hore weeraro ugu qaadey tuuladaas kuwaas oo khasaare kala duwan gaystey.
Kooxdaan ayaa sanadkii 2017 waxay Af-urur ku qaadeen dagaal kadis ah halkaasoo ay ku dileen 50 qof oo isugu jirey ciidamo iyo shacab daganaa tuuladaas.
Qabsashada Af-urur ee Ururka Al-Shabaab oo aan aheyn markii ugu horeysay ayaa imaaneysa xilli ciidamadii Puntland la isgu keenay difaac ay kaga jiraan Tukaraq halkaas oo ay isku hor-fadhiyaan ciidamada Somaliland.
Madaxweyne Gaas ayaa tan iyo intii uu la wareegey hogaanka Puntland ee Somalia waxaa sii xoogeystey weerarada Ururka Al-Shabaab iyo Daacish ee ka dagaalama qaybo kamid ah gobolka Bari ee maamulkaasi ku qaadaan ciidamada Puntland.
