Hargeysa, Somaliland, February 25, 2016 (Saxafi) – Guddida heer qaran ee Gurmadka Abaaraha Somaliland iyo Madaxda hay’adaha Warbaahinta Madaxa banaan ee ka hawl-gala Somaliland, ayaa shalay kulan ku yeeshay Qasriga Madaxtooyadda Somaliland, kaas oo ay labada dhinac kaga wada-hadleen sidii ay iskaga kaashan lahaayeen in gurmad xoogan loogu sameeyo dadka abaaruhu faraha baas ku hayaan ee gobolada kala duwan ee Somaliland.
Kulankan oo ay labada dhinac si aad ah ugu lafo-gureen sidii ay arrintaas gurmadka uga wada-shaqayn lahaayeen, isla markaana ay warbaahinta oo ay guddidu ku tilmaameen inay fure u noqon karto inay hawshaas bina aadamnimo ku guulaystaan si weyn u soo dhawaysay una aqbashay inay door muuqda ka qaadan doonaan gurmadka dadka abaaruhu saameeyeen.
Afhayeenka Madaxtooyadda, Cabdiraxmaan Sh. Cilmi Fahiye (Shamax) oo geba-gebadii kulankaas oo war-saxaafadeed ka soo saaray, ayaa waxa uu u dhignaa sidan: “Guddida heer qaran ee gurmadka abaaraha ayaa maanta Qasriga Madaxtooyada kulan kula yeeshay masuuliyiinta hay”adaha Warbaahinta ee ka hawlgala Dalka Somaliland.
Gudoomiyaha guddiga heer qaran ee gurmadka abaaraha, ahna Madaxweyne ku xigeenka JSL Mudane Cabdiraxmaan Cabdilaahi Ismaaciil (Saylici) oo ay wehelinayeen xubnaha kale ee guddigu oo isugu jira Wasiiro, Culimo awdiin iyo Ganacsato, ayaa waxaa ujeedadiisu ahayd sidii Warbaahinta kala geddisani u dardar gelin lahayd waajibka ka saaran baahinta Xaaladda Abaareed ee dalka .
Xubnaha guddiga abaaraha ayaa Warbixin ay siiyeen masuuliyiinta xubnaha Warbaahinta waxay ugu horaynba usoo bandhigeen Akownada (Accounts) la rabo in lagu soo shubo qaddarka lacageed ee qof walba iskii isaga goynayo.
Akownadaasi (Accounts) oo kala ah sidan:
ZAAD: 4720222
E-DAHAB: 52222
DAHABSHIIL BANK: 20500
SALAAMA BANK: 60186075
BAANKA DHEXE EE SL: 574
Guddigu waxay Warbixintooda ku sheegeen in abaartu baahayso dalkana ay caam-yeeshay la arkayna Xoolo-Xoolo cunaya markay baad iyo biyo waayeen, iyo xoolo talaxgabay iyo Xoolo-Xoolo waydaaranaya markay goobtii ay ku sugnaayeen abaaruhu ku habsadeen.
Guddiga gurmadka abaaruhu waxay ku dhawaaqeen in xaaladu tahay sidii dabdamis oo kale in loo ordo, waxna la gaadhsiiyo dadka iyo duunyada baahan.
Xubnaha guddiga abaaruhu waxay sheegeen in waftiyo isugu jira Culimo awdiin, Ganacsato iyo Warbaahintu laga bilaabo maanta ilaa maalinta Jimcaha ay u bixi doonaanan jiidaha Sanaag Bari iyo jiida Saylac iyo galbeedkeeda, halkaana ay gaadhsiin doonaan taakulayn, Warfidiyeenkuna ay kasoo warami doonaan xaaladaha ba’an ee abaarta ee jiidahaasi, kuna baahin doonaan qalabka warbaahinta ee kala duwan.
Xubnaha taakulaynta abaaraha ee heer qaran waxay amaaneen gurmadkii cawska ee dadweynaha Gobolka Togdheer u qaadeen dhinaca Gabiley, taasoo guddigu ku tilmaameen talaabo nafqeybsiya oo mudan in lagu daydo .
Guddigu waxay ka codsadeen (durraanteen) dadweynaha in qof walba iska gooyo wixii karaankiisa oo deg deg ah kuna shubo, Akoonada la iclaamiyey, taasoo marka laysku dardaro samata bixin doonta dad iyo duunyo badan, Waxbintaasi ha ahaato sadaqad, Seko iyo deeq kale oo naxariiseedba.
Guddigu waxay sheegeen inay Warbaahintu tahay awood xoog leh oo u dhiganta awooda dhaqaalaha loo uruurinayo gurmadka abaarta
Dhinacooda xubinihii Warbaahinta ee ka qeyb galay kulanka waxay iskala afnoqdeen, inay qaateen baaqa loogu yeedhay, balan qaadeena inay dardar gelin doonaan hawlaha warbaahineed ee xaaladaha abaaraha farsamooyinkooda kala duwana, u adeegsan doonaan baahinta xaaladaha abaarta islamarkaana ay halkaasi qaar kamida Hay”adaha Warbaahintu kaga dhawaaqeen hordhaca qaadheen lacageed.
Xubnaha Warbaahintu waxay sheegeen inaan laga baryeynin ka qeyb galka gurmadka aabaraha, waajibna ay ku tahay muujinta iyo baahinta baaxadda abaaraha ka taagan dalka.
Ugu danbayn waxa uu Gudoomiyaha Guddida Abaaraha ahna madaxwyene ku xigeenku sheegay inay qaylo dhaanta abaaraha gaadhsiiyeen Caalamka gaar ahaan Wadamada Carabta, qaylo dhaantaas oo ay ka soo jawaabeen Imaaraadka Carabta dalkana ay u soo dirayaan wefti heer caalami ah oo u kuurgelaya xaalada abaaraha ee dalka.
ALLAA MAHAD LEH”
